Niri buruz
Giza zientziatan formatua eta animalia zalea, nire lekua animalien eta pertsonen artean dago. Nire ustez, bizitza hobea da bi munduak batzen ditugunean, eta, horregatik, elkarrekiko gerturatzea, errespetua eta maitasuna kutsatzea eta gure harremanetan aldaketak eragitea bilatzen dut. Elkar ezagutuz, zainduz eta onurak bi norabideetan eragiten dituen harremanekin.
Animalien Heziketa: "Kasu egiten irakastea" baina askoz gehiago.
Heziketaz hitz egitea gustatzen zait, trebatzeaz baina gehiago, animalia bat heztea aginduei kasu egiten irakastea baino askoz gehiago delako. Hezkuntza emozioak behar bezala kudeatzean, beste izaki bizidun batzuekin harreman egokiak izaten jakitean eta egoera desberdinetara modu orekatuan egokitu ahal izateko tresnak eskaintzean datza.
Prozesu horretan, haien ongizate emozionala eta gatazkak konpontzeko gaitasuna sustatzen ditugu, modu orekatuan eta zoriontsuan bizitzen lagunduko dioten erabakiak hartzeko aukera emanez. Prozesu hori konplexua izan daiteke, eta animaliak eta gizakiak elkarrekin hazi behar dute, konfiantzan, komunikazio eraginkorrean eta elkar ulertzean oinarritutako lotura eraikiz.
Zalantzak dituzu? Hemen naukazu laguntzeko.
Zure txakurkumearekin etsita al zaude? Zure katua ulertzen ez duzula sentitzen duzu? Zure maskotaren portaera jakin batzuk nola kudeatu ez dakizulako frustratuta zaude? Animalia berri bat sartuko duzu etxera, eta zalantzak dituzu nola egin? … Zure animaliari buruzko edozein zalantza galdetzera gonbidatzen zaitut.
Gakoa: zure animalia ulertu.
Niretzat, garrantzitsuena zure animalia ulertzea da. Horrek pazientzia eta denbora eskatzen ditu, eta hasieran gehiago kosta badaiteke ere, askoz asegarriagoa, iraunkorragoa eta eraginkorragoa da epe luzera. Zuk ikasi eta garatu behar duzu harreman sendoa eta ulerkorra zure animaliarekin. Prozesu honetan gidatzea da nire helburua, bizikidetza harmoniatsua eta gogobetegarria lor dezazun.
Txakurrek lagundutako esku-hartzeak.
Ba al zenekien pertsonen eta txakurren arteko konexioa erraminta eraldatzaile eta terapeutikoa izan daitekeela?
Metodologia modernoa dirudien arren, Antzinako Grezian ditu sustraiak, non animaliekin hartuemanaren onura terapeutikoak jada aitortzen ziren. Orduz geroztik, praktika honek bere garapena izan du, eta gaur egun, baliabide eraginkor gisa finkatu da, hainbat testuingurutan –errehabilitazio fisikoa, hezkuntza, laguntza psikologikoa, pertsona nagusien zaintza…– izan duen eragin positiboa frogatzen duten hainbat ikerketa zientifikoren bermearekin.
Esku-hartzeen arrakastaren gakoa laguntza-txakurraren eta pertsona profesionalaren arteko lankidetza estu eta koordinatuan datza. Laguntza-txakurraren presentzia eta garatzen dituen trebetasunak profesionalaren egiten jakitearekin eta gidaritzarekin konbinatuta, talde boteretsua sortzen du, eta onura ugari eskain diezazkieke programen erabiltzaileei.
Gure kasuan, laguntza-txakurrak Kala du izena, azabatxea bezain beltz eta distiratsua den labradorea, dedikazio eta ardura handiz prestatua, eta gure esku-hartzeen bihotza dena. Palanka batek objektu bat mugitzeko aplikatutako indarra biderkatzen duen bezala, laguntza-txakur batek profesionalaren indarra biderkatzen du interesatzen zaizkion aldaketak eragiteko.
Esku-hartze bakoitza modu pertsonalizatuan diseinatzen da, pertsonaren beharren arabera. Berebiziko garrantzia ematen diot pertsona bakoitza bakarra dela ulertzeari, behar, interes eta motibazio partikularrak dituena.
KALA, laguntza-txakurra.
.jpg)
Formakuntza
Inoiz sentitu al duzu pertsonen eta animalien arteko loturak duen botere eraldatzailea?
Pertsonen ongizatea eta animaliak lotzeko ideia gustatzen bazaizu, mundu hau ezagutzera animatzen zaitut. Zatoz animaliek lagundutako esku-hartzeek pertsonen bizi-kalitatea hobetzeko eskain dezaketena ezagutzera.
Ikuspegi hirukoitza: teoriaren garrantzia, gaitasunen garapena eta garapen pertsonala.
Teorian sakontzea gustatzen zait, gauzen zergatia ulertzeko beharrezkoak diren oinarriak ematen dituelako eta azterketa eremuaren ikuspegi zabalagoa eta sakonagoa ahalbidetzen duelako. Gainera, ezinbestekoa da gaitasunak garatzea, txakurrek lagundutako esku-hartzeen eraginkortasuna bermatzeko, parte hartzen duten alderdi guztien ongizate integralarekin batera.
Eta, horiekin batera, nire helburua ere bada ikasle bakoitzak bere bidea egiteko behar duen motibazioa eta konfiantza aurkitzea, eta, horregatik, horretarako egokia den giroa sortzea bilatzen dut, parte-hartze aktiboa, hausnarketa eta elkarrizketa irekiak ahalbidetzen dituena, autoezagutza eta garapen pertsonala sustatzeko asmoz.
Testigantzak
M. Telleria, Pedagogia Terapeutikoko Hezitzailea.
"Ezinezkoa egiten zait azaltzea benetan ikasi eta sentitu dudana ikastaro honetan zehar. Sortutako giroa zoragarria izan da. Eskerrik asko erakutsitako guztiagatik, mundu berri bat ezagutarazteagatik eta ongizatea zabalduz mundu hobeago bat eraikitzea posible dela erakusteagatik."
A. Carrasco, Gizarte Langilea.
"Lehen egunetik, Eiderrek giro atsegina eta segurua sortu zuen, non denok eroso eta motibatuta sentitzen ginen aktiboki parte hartzeko. Ikasketa horrek, nire ezagutzak zabaltzeaz gain, hainbat modutan inspiratu nau. Gaian sakontzen jarraitzeko eta nire etorkizun profesionalean eragin esanguratsua eta iraunkorra izango duen proiektu bat diseinatzeko motibazioa eman dit."
A. Roldan, Administraria.
´´Ikastaro zoragarria izan da, Eiderrek eta Kalak oso ondo azaldu eta transmititu dutena, etikatik, logikatik eta naturaltasunetik. Oso talde ona eta energia handikoa sortu dugu, beti ikastaroaren eguna noiz iritsiko irrikaz. Eskerrik asko Eider eta Kala!´´
